政情：沈祖堯囡囡都揀讀醫
尋日全城焦點都放喺會考放榜上，中大校長沈祖堯囡囡沈詠恩不負眾望，成功考獲八優一良。詠恩話，父母都係醫生，對醫科有較多接觸，唔排除拔尖時會選擇讀醫喎。除咗囡囡外，一名自稱係沈祖堯超級粉絲嘅考生亦考獲九優佳績，都話要追隨校長嘅步伐，入港大讀醫。
沈祖堯尋日朝早要出席公開活動，唔能夠陪囡囡返學校攞成績。佢笑言自己都覺得好緊張，尋晚亦已安慰囡囡，同佢講盡咗力就得嘞。而喺女拔就讀嘅詠恩知道自己考獲佳績後，都感到好意外，佢話爸爸間中都會抽空教佢喎，仲考慮緊入讀中大醫科添。
考獲九優嘅拔萃仔梁俊彥係沈祖堯嘅「超級粉絲」，佢話好欣賞沈祖堯喺沙士期間帶領一隊醫生向市民交代疫情，仲直言係沈祖堯啟發佢想做醫生添。佢又大爆自己由細到大都同沈祖堯住同一個屋苑，平時都會同佢打招呼，仲試過同詠恩一齊學琴，但就笑言：「都唔知佢認唔認得我喇！」