政情：拒談遠親敗選 唐驥千寧講CY
理工大學「唐炳源廣場」尋日舉行命名禮，作為已故南海紗廠創辦人唐炳源兒子嘅唐驥千同家人一齊出席見證。唐驥千同特首候選人唐英年嘅爸爸唐翔千係同一個輩分，問佢對唐唐敗選會否感失望時，佢就不願置評，而對於唐唐應該何去何從，佢就話同唐唐只係遠房親戚，唔可以代表唐唐講嘢喎。反而佢就話聽朋友講CY係好人，希望係真咁話。
楊敏德好識宣傳
尋日適逢唐驥千八十五歲生日，佢太太唐潘靜筠同三個仔女、新抱及孫仔都有陪伴在側，仲一齊喺理大切蛋糕添。雖然唐驥千要用拐杖行路，但依然精神奕奕，佢話理大同唐家好有淵源，佢爸爸早喺六十年代已經擔任當時理工學院籌委會首屆主席喇，兩父子可謂又出錢又出力。
作為理大校董會主席嘅楊敏德都好識做，特登為唐驥千唱生日歌。問楊敏德有無獲CY邀請留任行會，佢就話無獲邀請，仲叫記者記得寫CY喺邊度畢業。CY係喺理工畢業嘅，楊敏德真係識為理大宣傳喇。