政府話喎，吸煙危害健康，所以成立控煙辦，又立例禁止煙草廣告，最近幾年更加將室內以及大量露天活動空間列為禁煙區。既然係咁，如果有人變相賣煙草廣告，苦口婆心勸人戒煙嘅政府應該點做呀？當然係應該雷厲風行將犯法者捉去嚴懲啦。
問題係，香港有一個膽大包天嘅積犯好得政府歡心o架，無論點樣目無法紀，一定會受到特殊優待。呢一個積犯就係惡名昭彰嘅壹淫媒，咁多年嚟做盡所有違規劣行，由始至終冇被重罰過，好多時候連控告都冇。好似舊年七月四日咁吖，壹淫媒旗下《蘋果日報》推介「嘆雪茄」，以所謂嘅「富豪級享受」引誘讀者成為煙民，明顯違反不准賣煙草廣告嘅條例，你估衞生署控煙辦有乜反應吖嗱？答案係毫無反應，冇控告，冇懲罰，只係畀咗封警告信就算數。亦即係話，特區政府再一次放生淫賤黎。
好嘞，爛果報尋日變本加厲，明目張膽以一大版篇幅又推介雪茄，圖文並茂講到吸食呢一種煙草好似好鬼死有型。喂，都話吸煙危害健康咯，教壞細路點算？其實唔使問阿桂，控煙辦九成九都係隻眼開隻眼閉，任由爛果報荼毒社會。
功夫茶真係想問問淫賤黎背後嗰一班提供全天候包庇服務嘅港英餘孽，餐餐維護一個無法無天嘅積犯，厭唔厭o架？攰唔攰o架？日日食龍蝦都想嘔啦，一年三百六十五日都要悉心照顧案底纍纍嘅壹淫媒，換轉係正常地球人一定會精神崩潰。
港英餘孽嘅包庇服務確係全天候o架，除咗違反煙草條例當睇唔到之外，對於壹淫媒違反《淫褻及不雅物品管制條例》，更加係照顧得無微不至，日日幫瀨屎BB換片嘅奶媽都冇佢哋咁有愛心。根據淫褻條例，犯法者最高可被罰款一百萬元甚至監禁三年，而壹淫媒至今屢犯一百二十七宗發布不雅物品罪，結果呢，罰款金額來來去去就係一萬幾千咁大把。大家要記住，屢犯一百二十七宗只係經過司法程序嘅驚人數字，未經過司法程序嘅縱容事例更加不計其數。
吸食煙草係會上癮嘅，計功夫茶話齋，港英餘孽包庇淫賤黎同樣上癮極深，否則冇可能長年累月不厭其煩保駕護航。正正因為餘孽包庇成癖，所以就導致壹淫媒荼毒成狂。
講番雪茄事件，爛果報公然挑戰法紀，即使今次控煙辦提出檢控，你估會點吖嗱？咁講啦，就算罰款雞碎咁多，積犯會繼續作奸犯科，鬼叫你毫無阻嚇作用咩！