大家仲記得○八年十月大埔富善邨一部電梯由十四樓直墜地面嘅駭人事故嗎？其實，類似嘅驚險場面耐唔耐就會出現，想忘記都幾難。呢，話口未完又出事嘞，而且仲係打孖上，屯門及觀塘兩日內分別發生墜(車立)及困人事故，簡直係陷阱處處，步步驚心。
屯門墜(車立)事故發生喺樓齡僅十一年嘅嘉悅半島，一對年輕夫婦日前喺電梯內經歷三秒急墜十層樓嘅險象，死過翻生，兩人揚言追究到底。追唔追究仲係題外話，大家最想知嘅係點解會墜(車立)？機電署例牌賊過興兵，經過檢查後發現，出事電梯五條鋼纜中有一條斷裂，而奇怪嘅係承建商奧的斯幾日前先至做過例行檢查，呢頭查，嗰頭出事，真係耐人尋味。
無獨有偶，觀塘裕民中心其中一部電梯日前亦斷咗一條鋼纜，導致居民被困。雖然兩單事故都冇人受傷，但居民飽吃驚風散，唔死一身潺。大吉利是講句，墜(車立)事故接二連三，今次就話冇人受傷啫，下次仲有冇咁好彩呀！
最搞笑嘅係，機電署早前啱啱公布最近十二個月嘅「註冊升降機承建商表現評級」結果，指期間共有五宗涉及升降機機件故障嘅事故報告，而該署先後向四間升降機承建商發出五封警告信。不過咁，被警告嘅並唔包括今次出事嘅奧的斯，你話咁嘅評級結果信唔信得過呢？
近年來，本港頻頻發生電梯安全事故，斷纜、墜(車立)、困(車立)，無奇不有，尤其係○八年大埔富善邨嗰次最震撼，八條鋼纜竟然斷咗七條，令人聞(車立)色變。申訴專員公署曾經主動展開調查，揭發機電署對電梯行業監管不力，敷衍塞責；申訴專員當時贈予機電署八個大字：「制度鬆散、執法不嚴」。事後機電署焗住亡羊補牢，建議修訂條例包括提高註冊工程師及業界工人嘅資歷要求，以及將違例嘅最高罰款額提升四十倍，由五千元增至二十萬元。可惜吖，條例就修訂咗，罰則亦提高咗，結果咪一樣頻頻出事！
歸根究柢，機電署做完一場大龍鳳之後就關人個關，既冇切實加強監管，亦冇繼續跟進，唔出事至奇。話時話，電梯行業除咗監管不足，業界人手不足亦係一個大問題，唔講唔知，一個維修工人閒閒哋要負責三、四十部升降機同扶手電梯，幾乎每日都要做十幾小時，有人甚至試過連續工作三十三粒鐘添。你話喇，喺咁嘅情況下，佢哋有冇可能仔細檢查每部電梯？
係人都知，電梯安全關乎人命，機電署監管兒戲，求求其其，簡直攞市民生命開玩笑。一句講晒，唔解決電梯行業嘅深層次問題，就冇可能防止電梯事故，而要解決深層次問題，首先就要向「制度鬆散、執法不嚴」嘅機電署問責！