新界鄉議局歷史悠久，但組織就比較鬆散，領導層早就睇到呢個問題，一直好想團結班鄉紳，增強政治力量同籌碼。尋日鄉議局執委會會議上，就有個「商議本局成員應對傳媒訪問的發言規範及考慮引入指定發言人制度」嘅議程，唔通係想由統一口徑開始做起？
僭建風波不斷燃燒，一班鄉紳你一言、我一語，令到訊息好混亂。鄉議局決定唔再畀班鄉紳任意發言，以免令人誤會當局立場，結果尋日就選咗十八鄉鄉事委員會主席梁福元做僭建事宜嘅發言人，其他人一律不宜發言。不過，話口未完，尋日梁福元發言之餘，上水鄉委會主席侯志強又出嚟噏嘢喇。
引入發言人制度自然係團結第一步，但咁做係唔係可以增加凝聚力，確實有待觀察。鄉紳們最喜歡話「各處鄉村、各處例」，何況成個新界有廿七個鄉咁多，幾百條村你話有幾多條例吖？睇嚟統一發言都唔係咁容易做到。