香港回歸祖國十五年，但立法會議員嘅表現就被指差過前立法局，除咗成日開會遲到早退唔專心，部分人連講嘢都唔識講，寫份法律文件甚至新聞稿都錯漏百出。立法會秘書處最近就請咗位英國爵士開班，教導一眾議員同議員助理點樣開會同面對傳媒。呢位英國爵士就係Malcolm Jack，佢做過英國下議院秘書，夠晒資格教精班香港後輩。
有關特訓班主要教授議會實務同程序、撰寫文件同報告、法律及特權等基本議會知識。後者就專為全體六十名議員而設，內容包括英國議會制度同程序嘅最新發展、議員與公眾同傳媒嘅關係、日新月異嘅綜合資訊服務等。原本個課程無乜嘢，但問題在於點解要使錢請個英國爵士來港開班，難道香港回歸咗十五年來都培訓唔出一位議會專家？
若要花納稅人嘅血汗錢專程請外人來港開班，應該喺班議員人工度扣番錢先至啱數。再者今屆立法會任期仲有幾個月就完結，依家使呢筆錢培訓班可能會落選嘅議員，係咪用得其所呢？