政情：張華峰開會狂咳：只係濁親
新冠肺炎第4波疫情肆虐，大家都提高警覺，有時喺街上見到隔籬有人咳兩聲，下意識都會行開少少避一避。立法會尋日朝早繼續2020施政報告致謝議案辯論，金融界議員張華峰（肥老闆）發言時，就係咁咳，究竟發生咩事呢？
話說肥老闆發言頭5分鐘，已經斷斷續續咁咳咗10幾次，之後亦未見好轉，有時仲會連咳好幾下。有立法會職員都即刻斟水畀佢飲，佢飲咗一次後亦有零星嘅咳嗽。好彩佢戴住口罩，唔會口沫橫飛。
指日前已做合併拭子檢測
本報記者其後問吓肥老闆身體有冇事，佢表示發言時只係濁親啫，飲咗水之後已經感覺好好多喇。佢又話前日（20日）已經做咗鼻腔和咽喉合併拭子檢測添！