夕陽政府果然冇運行，停駛約兩個月嘅昂坪纜車上周四重開，朝早運作暢順，下午又因雷暴警告一度停駛兩個多小時。之不過，昂坪纜車停吓開吓，港人已耳熟能詳，見怪不怪！
鬼咩！○六年九月首次通車至今，因大大小小事故暫停服務超過十次，平均幾個月就要停駛一次，身為「國際大都會」、「好客之城」嘅香港，咁嘅服務水準真係嚇死遊客，更令港人蒙羞！
提起昂坪纜車，老朽竟然第一時間浮想起教育局局長孫明揚，並非老朽曾是教育界一分子，而係孫公過去一年多進進出出醫院起碼五次。心水清嘅話，孫公由上年至今，已經先後因小腸氣、腎病、退伍軍人症，以及掛住睇波（球賽）而摔倒入院，今次係第二次因小腸氣做手術！
昂坪纜車停吓開吓而臭名遠播，而孫公入吓醫院又出吓醫院，見親佢嘅消息多與教育無關，而係佢嘅福體是否安康。佢就話因「興趣」而工作，死要與夕陽政府共進退！興趣都要因時而變，老朽年輕時興趣係攀石長跑，如今你叫我上山採花都有心無力，所以話唔可以因「興趣」就霸住個高位而做唔到嘢架！
老朽上年四月二十九日在本欄詰問《孫公勇者無懼？》，老早叫佢退休，千祈唔好學煲呔曾咁叫市民撐佢！煲呔曾「臥」港七年，政府的「內控環境」一塌糊塗，貪嘅貪盡、hea嘅hea盡，致使香江在風雨中飄搖，呢個爛攤子如何收拾，CY真係要好好用心去諗，以挽回政府形象及港人信心。