政情：解釋「一人兩票」玩謝市民

有立法會議員話，即使一早已經知道信中內容，但都要花啲時間去咀嚼信內嗰啲「又否定、又肯定」，難怪普通市民都睇到一頭煙，建議政府用一啲「通俗」嘅文字去宣傳。

政制及內地事務局局長譚志源尋日終於認衰，話理解有時政府信件嘅法律性字眼會比較多啲，令一般市民較難明白，承諾當局會喺嚟緊嘅選民登記運動中，用番啲淺白嘅方法去宣傳喎。

所謂「一人兩票」，就係所有非功能組別嘅選民，除地區直選嘅一票外，將會被自動登記成為「超級區議會」合資格選民，要解釋清楚嘅話相當容易，唔明政府點解咁都搞到一鑊泡囉！