笑看天下:龍豬傳奇之炸深咗

唐唐呢隻龍豬,據說變得高深莫測,總之你估佢唔到,一時「掘深咗」就變成二千多呎嘅地下唐宮;一時化身人肉炸彈,喺無證無據下,大爆行會機密內容,對CY進行「人格謀殺」;明知自己民望低殘,大勢已去,不惜與對手玉石俱焚,真係估唔到龍豬可化身阿蓋德!

不過,龍豬呢鋪肯定炸深咗!除了誠信破產,更涉違反選舉條例。喂,「掘深咗」單嘢手尾仲有排搞,如今又面臨誣衊刑責,以如此「待罪」之身,鞠多兩次躬,都冇可能做到特首啩?

命好的唐唐,其實錯入「官門」,以佢九唔搭八嘅性格,講真,佢係一個「創奇者」,更是一個積極的樂觀主義者!點解咁講,先前佢答學生問:世界末日會做啲乜?佢話會「珍惜每分每秒,以經驗、能力同團隊為香港創造更美好將來。」

嗱!唐唐面對末日,仲有心情用笑聲救地球,想當年市道低迷,佢話用「一個菠蘿包可救經濟」,如今竟用到兩個「秘製菠蘿」對付CY,可見佢視對手如「有物」,不禁炸深咗!

不過,呢位「創奇者」,今趟「炸深咗」,不但末日創唔到未來,除了令中央震怒、全港嘩然,肯定改變埋自己一生!

《舊約》中,天神預言蛇將失去四肢,終身用「腹部行走」,呢個預言的確實現了!如今龍豬「炸深咗」,禍及己身,老朽預言佢將化身為黑蛇,繼續掘窿,提早冬眠!