政情：林鄭行長命梯怕冧山泥
老一輩人嘅童年多數都係艱苦嘅，好似發展局局長林鄭月娥嘅童年都有難忘回憶。林鄭尋日出席一個防止山泥傾瀉宣傳活動時，就同大家分享自己童年嘅驚險回憶，原來佢細個每日都要行路返學，每當落大雨都要面臨生命威脅，就係驚冧山泥喎！
話說佢由小學至中學都喺堅尼地道返學，每日要行二百幾級樓梯先返到學校，真係少啲腳骨力都唔掂。佢話，每次落大雨時行經條長命樓梯時，都好驚會突然發生山泥傾瀉，好彩咁多年來都有驚無險，唔係今日都唔會企喺呢度喇！
尋日仲發生咗一段小插曲，在場人士有位見習土木工程師，佢同林鄭嘅英文名一樣叫Carrie，兩人惺惺相惜，對方仲即席揮毫，寫咗「廣廈蔭永」四字喺把紙扇度送畀林鄭，寓意香港居民住得安樂，希望林鄭收咗之後，真係可以令港人安居啦！