政情：張國柱樂做立會「投訴王」
市民有冤無路訴點算好？好彩仲有立法會當值議員處理投訴嘅制度，立法會秘書處回覆議員就預算案嘅質詢中發現，由去年四月一日至去年底，秘書處共收到一千四百幾宗投訴，社福界議員張國柱就接咗其中嘅三百五十三宗，佔整體投訴嘅四分之一，而佢完成嘅投訴就有一百五十八宗，同樣冠絕所有議員，稱得上係「投訴王」。
多謝秘書處同事幫手
張國柱話，做咁多投訴係因為佢係社福界議員、其次佢又係立法會福利事務委員會成員，加上佢一貫立場認為議員有責任幫市民，所以對任何投訴都來者不拒，於是咪做得最多囉，但都要多謝秘書處專業嘅同事幫手喎。
有人勤力當然有人懶散，立法會四大懶蟲之一嘅體育界議員霍震霆（Tim霍），仲有旅遊界議員謝偉俊（Paul），都只係接咗廿四宗投訴。Tim霍就話唔使直選啫，但盛傳空降九龍東直選嘅阿Paul就要急起直追喇！