「林瘋」效應有利亦有弊，隨着林書豪爆發帶動「瘋」潮，一眾紐約人球員竟然都受到牽連，經歷連場激戰後，high到集體瞓唔着，要醫生幫手尋求入睡良方。J.Lin產生「林失眠（Linsomnia）」，但紐約人後備盧雲克就話，若然球隊場場贏波，瞓少啲又有咩所謂。唔知佢哋打完喺周一凌晨作客「綠軍」波士頓塞爾特人場波，又會唔會繼續「林失眠」呢？（now 635周一凌晨２時直播）
多得「林瘋」效應，麥迪遜廣場公園幾乎場場爆滿，上場紐約人反勝騎士振奮人心，主場球迷嘈到拆天，紐約人球員亦high到腎上腺素飆升，搞到集體失眠。近期同J.Lin一同因表現好而上位嘅盧雲克，接受WFAN電台訪問時表示：「通常我哋都係半夜先離開麥迪遜廣場公園，幾乎全隊球員返到屋企都瞓唔着，因為實在太high嘞！」
由於球隊怕球員缺乏足夠體力，所以特別請來醫生睇症，一眾「林失眠病患者」都非常聽話，聽取醫生建議臨瞓前飲熱牛奶、花草茶及數綿羊等，甚至不斷聽由醫生燒錄嘅減壓CD，希望盡快見到周公，但盧雲克就話：「唔知醫生套建議得唔得，但如果紐約人繼續贏，遲啲先瞓着甚至唔瞓都係值得。」
紐約人今仗造訪塞爾特人，教練迪安東尼尋日就安排巴朗戴維斯夥拍林書豪鎮守後場打造「巴林組合」，J.Lin好可能會轉型成為得分後衞。另外，由於哈佛大學位處波士頓，這場比賽被傳媒視為林書豪「回家之旅」。據最新門票價格，平均每張267美元，比起J.Lin首戰塞爾特人時，上升過百美元。既然J.Lin有「半個」主場之利，今場紐約人作客受讓又點可以唔支持？
本報綜合報道