政情：添馬艦殺菌 又嘥30萬
煲呔曾臨尾香，得番幾個月任期先被踢爆任內貪盡海陸空，真係天網恢恢。不過，佢貪腐之餘，仲連累納稅人花咗唔少冤枉錢去滿足佢嘅個人願望，好似添馬艦新政府總部同立法會新大樓因為趕入伙而爆出退伍軍人症桿菌，以及空氣內嘅揮發性有機化合物（TVOC）含量超標，原來當局為咗執手尾，使咗近三十萬元公帑滅菌消毒。
行政署為咗消毒、清洗新政府總部食水系統及安裝濾水器，一共花咗十五萬七千二百元。至於先有惡菌、後有毒氣嘅立法會新大樓，亦花咗十三萬七千元去買消毒清潔用品、濾水器、蒸餾水及吸走毒氣嘅植物，納稅人嘅錢咁就畀煲呔曾呢啲貪官兼庸官白白浪費，如果用嚟扶貧，相信會幫到好多人。
執漏工程無了期
耗資五十幾億元嘅添馬艦建築群項目連環甩轆，到依家都未搞掂，直至上個月底，立法會新大樓仲有近三成工程未完成執漏、新特首辦就仲有兩成、新政府總部都有近一成執漏未搞掂，所以話煲呔曾真係害人害物。