政情：湯顯明學貪曾頻密外訪
煲呔曾貪盡富豪提供嘅海陸空款待外，多年來官式外訪都使盡公帑，任內五年外訪多達五十四次，要納稅人付鈔一千多萬元。煲呔曾豪使公帑外訪嘅陋習，就連喺○九年獲佢眷顧秘密續約三年嘅廉政專員湯顯明都習染，上一個財政年度共有九次外訪，離港共卅八日，即係一年夾埋有成個月時間唔喺廉署坐鎮，同煲呔曾一樣都係無王管。
共使23.5萬元
每年立法會議員審議財政預算案建議時，都會從中得悉政府嘅敏感資料，本報就喺湯顯明向立法會特別財委會提交嘅文件中，發現佢喺上一個財政年度九次外訪，合共去咗卅八日，除咗分別去咗一次南美、英國及新加坡外，其餘大部分都係返內地同埋澳門，合共用咗廿三萬五千元公帑，除開平均每日使咗六千一百多元，仲多過政府向市民派發嘅六千元，所以高官以外訪名義使錢真係易過借火。
湯顯明嘅九次外訪中，有兩次去咗澳門，其中一次去兩日，使咗三千九百元，即係平均每日使咗二千元。另一次就去咗四日，合共使咗一萬三千三百元，即係一日使三千三百多元，使多咗六成幾，莫非同事嘅使費要計埋落去專員條數度？湊巧嘅係，湯顯明全年九次外訪總共去咗卅八日，而煲呔曾去年都外訪咗十次，夾埋去咗卅九日，唔話佢哋同撈同煲都唔得啦。
湯顯明近期多得老細煲呔曾帶挈，不但被人翻舊帳話佢喺○九年獲煲呔曾秘密續約三年，而本報經追查下亦揭發佢原來同東海集團主席黃楚標關係密切，兩人相識多年兼且係高爾夫球波友，咁啱煲呔曾早前又租咗黃楚標旗下嘅深圳東海花園豪裝單位，只係東窗事發後先至宣布退租，所以佢哋三人嘅「鐵三角」關係真係耐人尋味，難免令人質疑湯顯明會干預廉署調查煲呔曾涉嫌收受利益醜聞。
話時話，湯顯明上年度去咗幾次內地，乜廉署同內地真係有咁多交流？定係貪污案件橫跨兩地呢？又唔知佢返內地時會否順道約埋啲好朋友去打高球聯誼吓呢？