政情：葉劉推介十大懷舊金曲
每個人都有自己嘅音樂喜好，好似立法會議員葉劉淑儀都唔例外，近日佢忽然懷舊，喺社交網站向大家推介十首心愛嘅經典金曲。葉太話，每首歌背後都有一個故事，值得仔細品味。排行喺葉太金曲榜首位嘅，係有南音經典之譽嘅「客途秋恨」，佢話呢首樂曲嘅歌詞非常優美，對於情人嘅思念表達得淋漓盡致，無論白駒榮或新馬師曾嘅演繹都相當傳神。
另一首甚得葉太歡心嘅，係膾炙人口嘅日本歌《Sukiyaki》，即係本港歌手杜麗莎首《眉頭不再猛皺》嘅原曲，佢話呢首歌大熱之時正值係佢嘅荳蔻年華，對於曲中描述嘅孤單一人忍淚前行嘅內容十分感動。葉太話，聽歌係佢長久以來嘅嗜好，曾經購買唔少唱片，但依家用手機就可重溫美妙嘅旋律，真係好方便。佢記得幾年前，愛女曾經送咗部iPod畀佢，仲入咗過千首佢喜愛嘅歌曲，嗰份心意令佢相當感動。