政情：賣咖啡選特首夠噱頭
特首選舉成為全城熱話，一間位於柴灣嘅咖啡店就食住個勢，大搞「自選特首咖啡杯」調查活動。咖啡店將三個特首參選人梁振英（CY）、唐英年（唐唐）及何俊仁（鐵頭仁）嘅肖像印咗喺咖啡杯個隔熱紙套度，市民買完咖啡就可以攞個隔熱套，然後統計吓參選人有幾多粉絲，唔少市民都排隊幫襯。
呢個咖啡調查由尋日起至下個月嘅特首選舉日期間舉行，咖啡店負責人黃先生話，大家都知道特首選舉係小圈子選舉，市民冇得投票，所以搞呢個活動等市民可以歎咖啡之餘，同時支持吓心儀嘅參選人。
不過，呢個咖啡民調嘅準確性有幾高就見仁見智喇，事關有客人話三個參選人都唔鍾意，所以是但攞一個隔熱套返去打小人喎，又有客人攞咗三個返屋企留念，估計最終都係搞噱頭居多。