政情：曾蔭權遺臭萬年
曾蔭權領導嘅政府過去七年來施政劣迹斑斑，佢趁住執包袱在即，過去一連三日就透過官方電台專訪為自己漂白，前日已黑心詛咒香港隨時會畀歐債危機拖累而爆煲，到尋日就話希望市民唔好記得佢，應記多啲新特首喎。煲呔曾禍港七年，做落嘅衰嘢一籮籮，梗係唔想有人記得佢啦，就好似古時秦檜殺害忠良，遺臭萬年，至今仍受到世人唾棄，更有人將佢製成油炸鬼洩憤，相信煲呔曾一樣，就算化咗灰市民都記得佢。
憂新特首搶「地盤」
煲呔曾喺訪問中口講就話叫市民多啲記新特首，但同時亦流露出佢擔心選出新特首後被人搶「地盤」。佢話，相信新特首係理智嘅，唔會強搶佢啲工作，仲睇死新特首做得唔慌好，甚至亂七八糟，因為新特首無行政權力喎，佢仲強調，行政權力喺七月一日之前，仲係由佢同政府負責，冇人可以干擾。聽到呢度，唔使畫公仔畫出腸都知佢想警告新特首咪干涉佢任內嘅工作，內心相當矛盾。
訪問中，煲呔曾仲流露出一貫小器兼記仇嘅性格，佢話自己嘅四十五年政治生涯當中，遭受過唔少人身攻擊，搞到連自己條底線喺邊度都唔知。做特首做到連底線都無埋，相信古今中外只係得佢一個。佢又不甘被人寸夕陽政府係跛腳鴨政府，佢話：「你哋話我跛腳都講咗幾年啦，但我哋有無跛到呢？」明明係跛腳鴨政府都仲要死撐話唔係，真係講大話唔眨眼。
如果大家記得嘅，煲呔曾經常將「我要做好呢份工」掛在嘴邊，被問到覺得自己做成點時，佢話呢啲唔應該由佢判斷，而係要等市民評價喎，但話口未完，佢又話會用「於心無愧」四個字來形容自己，仲話自己每分鐘都盡心盡力做好呢份工。禍港多年都仲夠膽話自己無愧於心，真係難為佢講得出。
煲呔曾仲話，極之鼓勵有野心嘅後生仔女做特首，但提醒佢哋要承擔工作上嘅光榮同代價，但佢就死都唔肯講做特首嘅代價係乜，淨係九唔搭八話自己今年六十七歲仲行得走得。不過，對於市民來講，煲呔曾做特首嘅代價就係惹來市民鬧爆，事關政治、經濟、社會民生方面全部倒退，真係害人不淺，所以佢話卸任後會離開一段時間，但相信好多市民希望佢走咗唔好返嚟。