中環出更：高永文父子 獅城舉機獵鷹
骨科名醫高永文係潮州美食達人，除咗研究潮州文化外，原來觀鳥都係佢嘅「飛佛」。放下手術刀，文靜嘅高醫生係「雀癡」，迷上觀鳥十多年，難得佢同大仔偉琛及細仔諾琛志趣相投，三仔爺不時孭住望遠鏡、專業相機及長鏡大炮，攀山越嶺尋訪隱世名鳥，足迹遍及香港、沙巴及印尼原始森林，攝影作品豐富。
訪印尼叢林與蟲同眠
早前高醫生又同家人出動，暢遊新加坡嘅樹林公園，觀賞當地著名留鳥「夜鷹」。為捕捉「夜鷹」嘅美態，高醫生靜伏在叢林內為兩子打燈，果然畀佢發現「目標」，點知托住盞燈不經不覺就兩小時，真係托到手軟。當地雀鳥種類繁多，鳥蹤處處，最後狂影數千張靚相，收穫甚豐。
觀鳥心曠神怡，但置身大自然，奇遇也唔少。高醫生憶述，有次舉家去印尼叢林探險，晚上住喺森林嘅簡陋旅店內，有晚半夜醒來，突然感到周身痕癢，細心睇真啲，原來滿身都係昆蟲，幸好佢膽子大，撥開昆蟲再瞓過。身為婦產科名醫嘅高太江孟儀都受歡樂氣氛感染，齊組「高家探險四人組」。
卓妮