中環出更：師承周詠琁 蕭曼貞為慈善獻唱
好多人鍾意唱歌，仲認真到追隨名師密密練。香港善德基金會副主席蕭何元鳳嘅細女蕭曼貞（Sarah）就係咁，年幾前同靚女歌唱家周詠琁（Charlene）學唱歌，愈唱愈好，最近仲出埋碟留念添！早前喺善德嘅周年晚會上，Sarah就上台獻唱兩首金曲，幫手籌到唔少善款，不過Sarah就話，重心會先放喺工作上，唱歌暫時當興趣喇！
Charlene笑笑口話，Sarah同佢學唱歌大約學咗年幾，睇住佢有明顯進步，對佢期望好高，原本想大力推薦佢返內地電視台表演，奈何Sarah工作太忙，抽唔出時間。Charlene仲形容Sarah係好有潛力嘅專業歌手，可惜佢暫時只能當唱歌係業餘愛好。啱啱畢業從事金融業嘅Sarah就話，要打好工作基礎先，唱歌之路可以慢慢行喎。
善德永遠名譽會長葉鍾佩雲同女兒鄧肇殷（Erica）都有到場，原本係仁濟醫院董事局副主席嘅Erica做到今日離任，事關佢同日本籍老公聚少離多，想有多啲時間去日本陪老公，更加緊要嘅係要盡快完成生BB嘅人生大事。Erica笑指，如果唔離開仁濟，估計佢仲有五年時間就會做主席，責任會重好多，驚自己分身乏術，只好作出呢個決定，仲講笑話，五年時間夠佢生兩個嘞喎！
董吳玲玲忙到聲都沙
善德主席董吳玲玲就忙到把聲都沙晒，但沙住聲都話要多謝籌委會主席藍國慶及聯席主席鄭穩偉幫手。晚宴開始前仲放映一套勵志微電影，保安局前局長黎棟國及教育局前局長吳克儉又再客串，演技仲愈見純熟添喎！
卓妮