中環出更:買護膚品羅范急到唔睇燈

每逢大時大節前夕,大家都各有各忙,好似啱啱過咗嘅聖誕節前夕,卓妮就見到行政會議成員羅范椒芬獨自現身中環皇后大道中,而且行色匆匆,過馬路時眼見附近冇車駛來,就唔理係紅燈定係綠燈都照衝可也。咁匆忙,原來羅太唔係急急腳去返工,而係去做天下女人認為嘅正經事,買化妝品是也!

上周四下午約三點幾鐘,卓妮見羅太過馬路後,隨即急急腳直上大型連鎖化妝品專門店一樓「濕平」,羅太先喺店內巡視一圈,最後駐足喺一個法國化妝品牌專櫃前,拎起一支又一支疑似係粉底液嘅化妝品,即席就塗喺隻手度試試,仲同其他顧客一齊逼埋問店員意見。羅太試上手嘅化妝品牌價錢非常大眾化,估唔到買嘢理應唔使睇價錢嘅羅太,平日消費都咁精明。

低調現身 好快有斬獲

羅太喺店內一試就十分鐘,期間仲對護膚同眼影用品相當有興趣,而且好快就宣布有斬獲。雖然羅太長期都係民調內五大最為人熟悉嘅行會非官守成員,但可能因為佢當日以一身全黑套裝低調現身,附近嘅女顧客都似乎冇為意羅太嘅存在,而羅太付款後,未趕得切將信用卡擺番落銀包,已經急住落樓梯走人,似乎真係好趕時間喎。

卓妮趁羅太離開同佢打聲招呼,羅太透露剛才只係買護膚膏。咁得閒買嘢,唔使幫忙處理政改咩?羅太話政改唔使佢幫,仲話「忙就嚟唔到啦!」又話聖誕同新年冇咩慶祝節目,然後講聲再見又一支箭走咗。羅太全程來去匆匆,唔知係咪想買護膚品化靚妝同家人度佳節呢?

卓妮

第一手消息請下載on.cc東網iPhone/iPad/Android/Windows Phone Apps