政情：郭位獲北京理大榮譽博士
去年就福島核事故頻頻上電視嘅城市大學校長郭位，尋日獲北京理工大學頒發名譽博士。據聞呢個銜頭唔易攞，歷來香港嘅大學校長中，除咗前中文大學校長馬臨外，郭位係第二位獲得此殊榮。郭位本身係核安全及可靠度研究專家，背景認真吃香，吸引內地大學垂青，一啲都唔奇。
開壇講「福島事故反思」
郭校長親自去北京接受博士銜，心情相當興奮，一場來到，仲順便開壇講吓「福島事故的反思」，佢致辭時又不忘拍心口話會繼續立足香港，面向世界喎。其實香港各大專院校都有頒發名譽博士銜頭，頒發嘅理由有好多，相反內地頒嘅博士銜就複雜得多，事關有關學位要經國務院學位委員會批准。
過去獲內地大學名譽博士學位者，非富則貴，包括已故全國政協副主席霍英東、長實主席李嘉誠、電影大亨邵逸夫等，殊不簡單也。