政情:唐英年突襲天后有奇遇

特首參選人唐英年昨突到天后港鐵站外派發單張,之後主動提出加強行政措施堵截「雙非」孕婦,認為倘有「雙非」孕婦違規來港產子,佢就要面臨兩年入境限制期,又話可參考外國經驗禁止足三十二周孕婦入境,用意明顯係避免喺「雙非」問題上畀對手梁振英(CY)住嚟打。

唐唐尋日落區有奇遇,首先電視藝員王俊棠路過,同唐唐反映英皇道斑馬線太窄,之後佢又遇到已故樂壇巨星梅艷芳胞兄梅啟明,期間梅啟明仲以梅姐遺產案為例,同唐唐反映司法黑暗嘅問題,唐唐無乜特別反應。要做特首就係要面對奇難雜症o架喇。

CY見融樂會選委

CY方面,尋日會見融樂會三名選委,會後三人都話仲未決定投票意向,但會計界蒲錦文同法律界韋智達都話,不一定提名畀泛民候選人何俊仁,明顯畀梁振英嘅少數族裔政策打動。

此外,組織泛民團隊參選社福界選委嘅民主黨中常委羅致光承認,曾向部分社福機構高層發電郵,建議佢哋若果未決定提名唐英年,最好就唔好參選選委會,因為如果提名唔係北京屬意嘅人選,可能會對機構日後嘅工作帶來不便。佢話今時今日佢會支持民主黨主席何俊仁參選特首,又話自己無意加入政府做問責局長。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!