政情：睇好內地樓市 陳健波梁美芬爭相投資

翻查議員嘅利益申報期間，發現波哥持有物業嘅一欄都有更新喎，佢唔單止喺香港持有物業，最近仲喺內地買咗樓添！我哋問佢到底點解兩地未通關嘅時候仲要買樓，唔驚買咗樓但每次返內地，都要強制隔離咩？佢就話其實係樓花嚟嘅，都有一年至兩年時間先真係可以入住，不過就睇好呢幾年經濟會好番嘅。

陳覺得內地較安全

之不過，波哥點解突然想喺內地買樓呢，唔通覺得香港地方狹窄住得唔舒服？佢話本身都冇諗住買，之不過經歷2019年反修例風波，覺得內地仲安全過香港先決定喺深圳買樓住。佢仲認為深圳交通都好便利，可以當作據點，以後得閒可以喺深圳去第二度旅遊咁話。

咁Priscilla又點呢？我哋睇過立法會嘅利益申報，佢喺舊年7月申報，透過公司持有兩個喺九龍西嘅物業，一個係住宅，另一個就係非住宅，而喺新界西同內地各有一個住宅物業，即前後合共4個物業。

梁託丈夫搞掂手續

睇番資料，Priscilla近年喺買樓投資方面似乎甚有研究，早於2016年就喺美國擁有一個住宅物業，但冇幾耐就賣咗。另外就喺前年一月嘅申報中，佢就少咗個九龍西住宅物業，話係放售咗紅磡黃埔花園中層單位，賺近350萬元。

問番Priscilla點解咁大膽，喺「疫」市下都敢買樓投資，佢就笑言不嬲都鍾意買樓，打算分散投資，話之前賣咗美國加州嘅物業，都係因為美國投資唔賺錢，所以最後都係賺得少少，同埋自己一向打算分散投資，又睇好內地市場，就快手去買。

至於喺邊個城市置業佢就無透露，只係大讚係一個幾好嘅城市，頗有文化色彩，自己相當滿意，暫時亦無租出去，自己有機會都想返去住吓咁話。但點解疫情下都返到內地，佢就透露當時先生在內地，可以幫手搞掂買樓手續，所以唔需要自己親身前往內地咁話。