政情：政府助長蛇齋餅糉歪風
但凡選舉，都要依足法例，嚴格規定候選人唔可以喺選舉期間向選民飲茶灌水嚟換取支持，否則將構成賄選，觸犯嚴重罪行。但選舉過後又點呢，選舉之前又如何？四個字講晒，咪都係「蛇齋餅糉」囉。政治人物慣常做開嘅活動唔算賄選，只係選舉期間特別搞嘅活動至算，咁大嘅漏洞係人都學得識，但偏偏政府隻眼開隻眼閉，根本係助長歪風嘅元兇。
舉個例，最近我哋收到張單張，話民主黨下個月會搞個中山購物一天團，計埋小費二百四十八蚊，大小同價，負責該團嘅旅行社更重錘出擊送贈每名團友某牌子手機，都咪話唔超值抵玩。
呢個中山購物一天團活動，以白鴿黨李華明（Fred）立法會議員辦事處名義，連同兩名觀塘區議會選舉落敗人李耀基和計明華舉辦，標榜全程香港直通巴士，毋須轉車，既可品嘗秋冬尋龍養生宴同脆鯇風沙乳鴿宴，又可參觀百年辛亥紀念園，只要有四十人報名就成團出發。
疑似為選立會鋪路
眾所周知，Fred早已張揚話明年未必再選立法會，政圈盛傳白鴿黨明年九龍東會分拆兩條隊出選，其中一隊有可能由李耀基擔大旗領軍，好大嘅嫌疑係，白鴿黨為咗贏下屆立法會，所以都要「蛇齋餅糉」一番，同建制派抗衡。李耀基接受查詢時話對此並不知情，但計明華就話，二百四十八蚊唔算好平，一日咋喎，又唔過夜，至於部手機，就係派都未必有人要嘅廉價貨。話雖如此，旅行團第一部旅遊車已經爆滿，依家開緊第二部。
其實，舊年工聯會深水埗屬會及地區服務處推出三十蚊豪華海鮮餐，被質疑利誘市民參加「撐政改大遊行」，不久前職工盟喺五一搞工人權益大遊行，聚餐只需四十蚊，仲明言有專車接送，亦被質疑係資助遊行，當時職工盟秘書長李卓人對聚餐直認不諱，但強調只係工友夾錢食飯，工會只係資助旅遊巴士往返遊行地點，以減省交通費開支。
「蛇齋餅糉」已經成為不可逆轉嘅風氣，無着數就無選票，無人再理議政質素，搞成咁，咪要多得政府囉。