立法會搬入添馬艦新大樓之後用晒新傢俬，留低唔少剩餘物資，由辦公室家具到文儀用品都有。立法會秘書處前排為五百五十多項呢啲殘餘物資舉行拍賣，議員可以優先競投，其次就係秘書處職員或者議員助理。
呢幾百件剩餘物資真包羅萬有，一應俱全，由書櫃、檔案櫃、枱燈、屏風以至花盆都有，就連枱同櫈都各有幾種款式，大部分由九四年開始，喺立法會用到臨搬之前。秘書處喺今個月初開始拍賣，一律以零蚊作為底價，前排結束第一階段拍賣，最終得八位議員對四十七件剩餘物資有興趣，似乎議員唔係太用慣二手貨。
睇番競投結果，議員似乎對舊大樓嘅櫈情有獨鍾，四十七件成功拍賣嘅物資中，櫈佔咗二十四件，唔通新大樓啲櫈唔好坐？其次係四張枱，而垃圾桶、梳化、遮架同埋枱燈及地燈，都各有三件。或者佢哋對啲舊櫈有感情，買番屋企長期擁有。