港澳辦主任王光亞可膺年度金句王：「成也英國，敗也英國。」真係可圈可點；「過去是聽boss，現在自己當了boss，都不知道怎樣當boss！」當局者迷，旁觀者清，信不信由你，反正老朽就是信了。
正當輿論一面倒說王光亞暗批煲呔曾施政無方，缺乏長遠規劃，實是為夕陽政府蓋棺論定，詞鋒好似凌厲咗啲，同中央關係密切嘅行會召集人、下屆疑似特首參選人振英哥出來唱反調，話王光亞嘅言論唔係針對任何人。
振英哥不記被煲呔曾暗指「政治抽水」之辱，果然係做大事者，不拘小節，差在未能「役身以進」，上演天將降大任於斯人也，必先勞其筋骨、苦其心志而已。之不過咁，老朽真係唔多明：難道王光亞針對嘅係維港上空啲懸浮粒子？
振英哥其實好值得欣賞，一定唔會死牛一便頸。振英哥由Ｎ年唔選到密集亮相，老朽連坐巴士望住個屏幕都睇到佢論政嘅親切笑容，還有一大堆頭頭是道的政見，其樂觀面對、積極進取、「當仁不讓」，應該成為公民教育的其中一課，令青年人知所進取，切勿輕言放棄理想壯志！
不想面對真相的人就是逃避現實，是以振英哥善疑，不沉溺過去，敢否定權威，這樣權威就不會凝固，也就不會變成阻礙政治進步的大頑石，這在當今缺乏信仰、不經大腦的年代，簡直是奢侈品。由此看來，振英哥比視民望如浮雲的煲呔曾更加似一個「政治家」，就算佢講得出未必做得到，也是務實。