啱啱「坐正」一個月嘅商務及經濟發展局局長蘇錦樑，果然超級惹火，人哋新官上任三把火，佢新官上任專惹火，局長張櫈仲未坐暖已經火燒後欄，問你服未。
蘇錦樑今次衰乜？咪又係僭建醜聞囉。佢喺麥當勞道嘅住所懷疑存在多項僭建，包括擅自拆走客廳外花槽及矮牆，加建咗落地玻璃門同圍欄。有測量師話，有關改動唔單止可能觸犯建築物條例，如果施工唔符合安全標準，會有石屎剝落甚至倒塌嘅危險。
唔係啩？僭建風暴已經吹咗幾個月，高官權貴衰完一個又一個，煲呔曾三番四次叫手下打醒十二分精神，瞄清楚自己名下物業有冇僭建，費事再爆醜聞，點不知衰開有條路，今次又輪到蘇錦樑斷正。
無計啦，煲呔曾其身不正，早排畀本報率先踢爆佢喺麥當勞道嘅物業有僭建，佢話就話會盡快拆除，但到依家仲未動工，蘇錦樑仲唔有樣學樣博大霧咩！
唔止有樣學樣，蘇錦樑住所嘅僭建程度仲犀利過佢老細添吖。僭建醜聞被踢爆後，佢至透過新聞秘書回應話，有關單位翻修前曾經諮詢過專業意見，又話上個月已經委託專業認可人士審視單位，不過物業涉及圖則久遠，問題複雜，牽涉專業技術，如果發現有問題會盡快跟進喎。唉，又係呢啲官腔，講咗等於冇講！
話時話，蘇錦樑身為問責局長，連最基本嘅政治敏感度都冇，僭建風暴已經吹咗幾個月，佢嘅住所涉及僭建居然話唔知，如果唔係今次被揭發，睇怕佢永遠都唔會主動做嘢。咁搞法，唔單止係政治敏感度不足，政治誠信更加令人質疑。
正如城市大學專業進修學院學術統籌宋立功話齋，蘇錦樑醜聞多多，啱啱坐正又被揭發住所僭建，誠信破產，只能怪自己達唔到局長水平，更令港府管治威信雪上加霜。
亦難怪嘅，蘇錦樑當初加入「曾家軍」，成為副局長，喺市民眼中本來就係「政壇僭建物」，完全係煲呔曾親疏有別，任人唯親，黑箱作業嘅怪胎。正所謂，名不正則言不順，唔怪得呢班政治新貴一出場就負面新聞不斷，尤其係八國聯軍治港及薪酬爭議，更加搞到滿城風雨。而呢位蘇錦樑仲加演一場「卡片風波」鬧劇添，簡直係一醜未平一醜又起。
計功夫茶話齋，政壇僭建物惹火，如果唔盡快剷除，跛腳鴨政府嘅後欄隨時燒通頂都似。