費托露點入波冧爆fans

巴克萊亞洲錦標賽王者戰昨晚於大球場上演,車路士以二比○擊敗阿士東維拉,主帥保亞斯於香港取得加盟車仔後首個冠軍,人氣王費蘭度托利斯換邊後露點強勢登場極速士哥,正式於亞洲之旅開齋,全場車迷即時失控狂嗌,令氣氛到達沸點。今次兩個賽日吸引逾七萬人觀戰,票房總收入逼近二千萬,叫好又叫座,可謂贏盡口碑。

新星麥伊治蘭閃電破門

車路士主帥保亞斯於決賽排出怪陣,派出安歷卡擔正攻堅,史杜列治及馬隆達於兩側支援,不過,眾星畀小將麥伊治蘭搶晒風頭,呢位超新星開賽不足一分鐘已極速士哥,表現搶鏡,新季大有機會上位。

王子第一腳掂波即入

阿士東維拉換邊後調入希斯基加強攻力,但效果平平,戰至五十四分鐘,人氣王費蘭度托利斯於場邊準備上陣竟罕有露點,現場球迷即時起哄,唔少女fans發出高分貝尖叫。踢到五十七分鐘,托利斯千呼萬喚始出來,同杜奧巴齊齊落場,加埋安歷卡組成進攻鐵三角,全場車迷即時嘈到拆天。

好戲尚在後頭,兩分鐘後馬隆達遠射,托利斯門前彈入,第一腳掂波即建功,球迷尖叫指數爆晒燈,氣氛進入今屆賽事最高峰,「王子」士哥後表現興奮,同拍檔杜奧巴擊掌兼攬頭攬頸,其後此子施射被基雲救出,未能梅開二度,但已引來全場球迷再次狂呼,最終球隊以二比○戰勝維拉捧盃。保亞斯取得上任後首個冠軍,大軍捧盃後無暇留港慶祝,昨晚已乘夜機返國。而維拉今日仍會出席活動,晚上將與布力般流浪離港。

巴克萊亞洲錦標賽決賽賽日入場人數為38,911,票房收入達到10,448,530港元,計同兩個賽日,合共有72,878人入場觀戰,總票房收入為19,812,080港元。英超旋風席捲本港一星期,球星所到之處人山人海,直接帶旺中環及尖沙咀一帶,隨住幾支球隊離港,追星之旅亦告一段落。