政情：毓民「衝擊」D9紅牌出場
政府為泛民主派「五區公投」補鑊嘅《2011年立法會（修訂）條例草案》遞補機制尋日喺立法會首讀，取代補選，以杜絕再有立法會議員透過辭職發動變相「公投」。
「五區公投」發起人之一嘅人民力量黃毓民自然要率領議會內嘅兄弟，向政制及內地事務局局長林瑞麟（林D9）「送大禮」。
撞埋枱邊 眼鏡飛脫
林D9開始宣讀草案時，人民力量陳偉業率先起身大吵大鬧，然後離開會議廳，之後輪到毓民接力，一個箭步行到林D9身前，一邊鬧一邊想搶林D9份講稿，兩人相隔只有半呎距離，形勢相當兇險。
就係千鈞一髮之際，六名立法會保安員閃出將毓民㩒住，混亂下搞到毓民撞咗埋枱邊，眼鏡即時飛脫，最後由保安員「護送」下離開會議廳。
雖然今次未能成功搶到林D9份講稿，但毓民事後話︰「我咁做係要喚醒市民對呢件事關注，起碼依家有人報道先吖！」佢又話，其實今次真係想掂到林D9，就算畀人告都冇所謂喎！