政情：唐唐玉樹募捐開口夾着脷

署理特首唐英年前晚出席《演藝界情繫玉樹關愛行動》大匯演，並壓軸代表政府致辭，話政府率先捐咗一億畀青海省政府，呼籲市民發揮香港精神、踴躍捐輸。不過，唐唐唔知係咪畀在場大明星們閃到暈陀陀，竟然又開口夾着脷，明明講緊內地賑災，無端端講咗去香港嘅「天災人禍」，雖然佢醒水即刻改口，但已無補於事。唐唐講錯嘢無數次，好似形容漢普頓酒店住戶「喺條街度條條fing」，又叫議員傾政改要「顧全大陸」，畀網民不斷惡搞，間接拖低民望。睇嚟唐唐要度高枕頭諗清楚，香港嘅天災人禍何所指？