德國槍神迹滅火
魯域斯基燒到107.4度照贏波！「波神」米高佐敦喺97年總決賽時曾發燒上陣，助公牛擊敗爵士至今仍令人津津樂道，「德國槍」魯域斯基尋日複製「神迹」，帶領小牛主場以86比83擊敗熱火，總場數追至2比2平手，香港時間明日早上續於達拉斯上演關鍵嘅Game 5。（周五早上9時高清翡翠台、now 635及有線165台直播）
魯域斯基開賽前感到身體不適，體溫高達攝氏38度，中場休息時候，體溫更高至41.9度，即係華氏107.4度，都咪話唔得人驚，但抱病嘅魯域斯基堅持上陣，取得21分及11個籃板，而且喺關鍵時刻挺身而出，助小牛奠定勝局，其專業精神受廣泛讚揚。
魯域斯基雖然周身唔舒服，但依然出席記者招待會，仲聲沙沙咁多謝各隊友嘅支持：「今場贏波關鍵係我哋防守非常出色，成功守住勒邦占士，係所有隊友努力嘅成果。」
大帝發波瘟 入得8分
「德國槍」威到盡，「大帝」勒邦占士卻衰到貼地，今場只得8分，喺佢之前五年季後賽，從未試過得分係單位數，而佢對上一次得分低過10分，已經係2007年1月騎士時代，距離依家已經有433場比賽。
勒邦占士唔滿意自己嘅表現，但話下場一定會捲土重來：「我知道自己可以做得更好，我會加強訓練。」
■本報綜合報道