中環出更：蔡冠深高球主禮 苦練開波靚又遠
中華總商會今年歡度一百一十一周年生日，早前喺南沙舉行「領事工商盃高球賽」，為一連串嘅開心派對暖身。會長蔡冠深自爆一段趣聞，原來去年佢為球賽主持開球禮時，竟然打唔到個高球不特止，仲連草皮都剷起埋，搞到勁瘀，佢話諗起都覺得好笑。所以今年賽前佢特登秘密練兵幾日，終於一雪前恥，開球打得又靚又遠。
今年蔡冠深同中總副會長莊學山、球賽贊助人霍英東基金會代表霍啟文等人一齊開球，之後高手們就開始落場鬥波，主客雙方混合組成十隊比賽，唔打波嘅團友就跟住蔡會長去參觀考察，各自各精彩。蔡會長話，佢哋年年都會邀請駐港領事及商會領袖一齊打高球聯誼，今年仲邀請埋廣州嘅總領館同商會，人數多達四十幾人，氣氛相當熱鬧。
帶領嘉賓考察南沙景點
當日競爭最激烈嘅係個人盃，最後由全國政協委員蔣麗芸老公、中總常董梁海明奪冠，莊學山胞弟莊學海就獲得「最近旗杆獎」，恭喜！恭喜！講番當日蔡會長率領嘅考察行程，先後參觀南沙開發區各大景點，包括製藥廠、南沙大酒店、南沙濕地等，了解外商於南沙投資嘅技術研發項目及旅遊資源，令嘉賓獲益良多。
卓妮