夕陽政府荒謬事特別多，接二連三有高官患病，尤其是六十七歲的教育局局長孫明揚，證實腎衰竭仍要表現出「有心有力」——晚上洗肚，日間帶病工作。孫公不止一次被發現在議事堂打瞌睡，坦白講，佢做教師會被警告及炒魷，因為在課堂上瞓着，做教育局局長難道就可公然打瞌睡而還要納稅人撐拒？
孫公為「捱義氣」而扮堅強——在重病中把夢想守着，不會害怕不會慌張？到頭來輸了健康值得嗎？孫公，退下教育呢瓣泥沼，與老朽喝杯茶笑看天下更實際。
夕陽政府人才難覓，否則有乜理由月薪三十萬嘅工，敲鑼打鼓都搵唔到人做？商務及經濟發展局長個位懸空成個月有多，據講仍找不到理想人選，最終或只能退而求其次，由醜聞纏身、被嘲「唔夠班」嘅蘇錦樑副局長接任。若然，蘇副局長可吐氣揚眉：咪話我執二攤，大哥，我都係捱義氣，焗住上，冇計！
老朽想起東漢有諫官陳蕃，直指桓帝把郎官視如一把菜隨便給人，反觀明帝在位時，皇妹要求皇上讓其子做郎官，這官雖是「掌守門戶，出充車騎」的小官，可明帝寧「賜錢千萬」給妹妺，也不讓其無德無才的兒子做郎官。
陳蕃通過比較，指明帝用人不唯親，只選用德行好的人；若然視官位如一把菜隨便給人，那根本談不上「敍德」、「量才」。今特區政府的擴大政治問責制，不正是視副局長及政治助理如一把菜隨便給人？搞到如今鬧人才荒，政府連自己種嘅果都唔敢嘗，如此嘥公帑唔眼冤就假！