中環出更：西崎崇子：日本需要核電
著名小提琴家西崎崇子近日獲中華慈善總會委任為「中華慈善愛心大使」，參與一個名為「青愛工程」嘅預防愛滋病活動。西崎崇子來自日本，卓妮見到佢當然要問吓日本大地震及核輻射危機啦，西崎崇子話，自己家鄉喺名古屋，當地冇受今次嘅天災影響，反而擔心佢妹妹及妹夫嘅安全。
擔心妹妹安全
原來西崎崇子嘅妹夫係一位醫生，居住地方離核事故重災區福島只有一百公里，事故發生後，當地好多人都患病，妹夫嘅工作量頓時增加，亦因此令到妹妹同妹夫兩公婆唔可以離開當地。核危機影響甚廣，西崎崇子反而唔係太擔心，但就促請日本政府要認真處理事件，因為核危機唔只影響日本，仲會影響其他國家喎。
西崎崇子又話，明白日本好需要用核電，要停用根本冇可能，但當地仍有餘震，希望日本政府千萬唔好掉以輕心，確保其他核電廠唔好受影響。西崎崇子愛心滿溢，早排聯同丈夫以公司名義捐錢賑災，佢好希望家鄉同胞盡快走出陰霾，重過新生活。