瞓得醫院梗係希望強身健體驅除病魔㗎啦，萬一反而搞到百病纏身，咁咪好鬼死冤枉？就好似最近接二連三出現嘅高官輪流打敗仗，其中一位病人政制及內地事務局局長林瑞麟入廠通波仔，唔應該害到佢老人家病情惡化啫，否則林公公冇可能做完手術第二日即刻火速返工。
功夫茶之所以咁樣講，無非係因為見到一則相當得人驚嘅新聞：退伍軍人菌攻陷瑪麗醫院。
呢單嘢事情係咁嘅，有一位八十一歲婆婆喺瑪麗留醫期間感染退伍軍人症，衞生防護中心當然走去調查啦，職責所在吖嘛。婆婆分別入住過C4加護病房以及C2深切治療部，衞生防護中心就針對呢兩個地方抽取水樣本化驗。驗一驗，大發現，真係驗出退伍軍人菌屬菌種。
之不過咁，驗出菌屬菌種唔等於搵到罪魁禍首，原來退伍軍人症菌種繁多，通常由血清第一型退伍軍人症桿菌致病，亦即引致婆婆感染嘅菌種，但係醫院驗出嘅兩個樣本並不屬於相同菌種。簡單咁講，令婆婆染病嘅係菌種Ａ，醫院驗到嘅係菌種Ｂ，兩者冇直接關係。
有一件事都幾離奇o架，機電署舊年先至喺瑪麗醫院抽驗過水樣本，當時話冇發現退伍軍人菌。嗱，千祈唔好話機電署驗得求求其其太敷衍呀，否則真係好傷感情o架。你知啦，政府部門驗過話冇事，然後死人冧樓嘅事例多到十隻手指都數唔晒，假如再添一筆糊塗帳，好難頂啫。
弊弊弊弊弊！探子回報，機電署竟然確係求求其其太敷衍，佢哋只係抽取淡水冷卻塔嘅水樣本，冇化驗水箱、水管同水龍頭。至於瑪麗咯喎，院方承認化驗醫院食水樣本嘅時候，不包括檢查退伍軍人菌。
唉，如果大家唔善忘，應該記得前九鐵行政總裁楊啟彥係死於退伍軍人症，即係話呢種惡菌係會致命嘅，機電署有乜可能唔嚴肅處理？瑪麗醫院又點可以掉以輕心？
萬一下次輪到唔知邊個高官又入廠大修，一個唔覺意沾染惡菌淪為退伍軍人症陣亡者，試問機電署甚至醫管局孭唔孭得起咁大隻鑊呀？即使卸膊一族有本事將責任推得一乾二淨，見到原本呼風喚雨嘅高官無辜辜變成退伍冤魂都於心難忍啦！
總而言之，唔該相關人等打醒十二分精神嚴密把關，成個公營醫療系統早就已經千瘡百孔，唔做得再敷衍塞責搞到公立醫院成為惡菌溫床。請記住，人人都會病，官僚唔例外，入院係驅除病魔呀，唔係送羊入虎口！