咦？風季都未到，雨都冇多滴，無風無雨因乜事幹會山泥傾瀉？呢鋪真係奇哉怪也，你唔好話係地震先兆呀，香港人神經極度敏感㗎，好容易會聯想到大亞灣核電站洩漏輻射，一個唔覺意又瘋狂走去「急性盲搶鹽」就醜死怪啦。
事情係咁樣嘅，何文田豪宅京士柏山對落有一個休憩公園，附近有一幅面積五十平方米嘅政府斜坡，前日失驚無神山泥傾瀉，一大堆泥漿係咁直落猛衝，衝到緩步徑都淹沒，衝到連鐵欄都毀壞。現場係晨運客勝地，消防員當然不敢怠慢啦，即刻出動生命探測器搜索。好彩咋，生命探測器搵唔到生命迹象，意思係話無人被困，算係不幸中之大幸。
好嘞，既然無風無雨，無端端山泥傾瀉係咪人為因素造成嘅呢？傳聞係話附近屋苑泳池泵房故障滲水，導致泥土鬆軟，卒之一瀉而下。至於官方講法咯喎，土木工程拓展署轄下土力工程處副處長陳震暉表示，修護工程由建築署負責，最近一次維修於去年十二月進行，未發現不妥之處，現階段無法猜測崩塌原因。屋宇署發言人就話嘞，該署斜坡小組人員到場調查嘅時候，亦聽聞有傳附近屋苑泳池泵房滲水。
真相到底係點？家陣冇人答得到你，不過功夫茶可以提供另一項數據，香港現存二千七百個潛在危險斜坡，預計需時十年先至可以消除！
呢嗱嗱嗱，唔係話嚇你，港產官僚好鬼死得意嘅，如果佢同你講「安全」，你行騎樓底最好戴鋼盔；如果佢同你講「危險」，你應該馬上進入逃難狀態。喂，記唔記得一連串冧樹事件呀？官老爺次次都話檢測過㗎嘞，冇事嘅，點不知隨即冧到一仆一碌，功夫茶記得前前後後最少造成二死一傷，印象最深刻嘅當然係赤柱冧樹殺咗一位女大學生。
即係咁，香港嘅管治模式就好比泥漿摔角，一個二個和稀泥，管人固然管唔掂，管樹都係危危乎。照咁嘅情況推測，無風無雨冧斜坡即使唔係地震先兆，都會係災難前奏，二千七百個潛在危險斜坡話唔定輪流山泥傾瀉！
喂喂喂，咪住先，先租後買「置安心」計劃其中一個沙田選址，聽講話政府打算將附近斜坡嘅平整、管理同維修責任撇甩，責任轉嫁到房協以及小業主頭上。如果真係有件咁嘅事，弊傢伙嘞，維修費用昂貴都仲係次要，政府卸責搞到山泥傾瀉先至係大鑊之中嘅大大鑊。
呢啲咪又係泥漿管治囉，置安心云云，難安心至真！