中環出更：孫鴻文搞App Game送機票
敬業樂業，幾時都係成功嘅不二法門，好似依家已經過檔去咗恒隆做董事總經理嘅陳南祿，以前做國泰嗰陣，每逢大時大節都堅持唔放假留守大本營，原來中華航空香港分公司總經理孫鴻文都一樣，每逢過節都一定開工，以防有突發事故發生。
愛爬山打波做運動
孫總自言係一個好會自得其樂嘅人，所以工作幾忙佢都甘之如飴，好似尋日佢哋華航推出全港首個航空公司iPhone App Game「Fun Fly」，呢個咁破格嘅諗法就係來自孫總，有得玩之餘，半年內最高分嘅頭十名參加者，仲有機會贏取來回港台嘅機票。孫總仲話睇好遊台嘅港澳人數大增，嚟緊佢哋仲會有包機飛台東，真係滿足晒港人愛旅遊嘅嗜好喎﹗
識得設計手機嘅網上程式，並唔等如就係打機宅男，好似孫總咁就不知幾咁外向，佢嚟咗香港已經有兩年零兩個月，每個周日都有節目，爬山、打波做運動，全部都係力的表現。