政情:鄭泳舜又弄璋唔追女

剛剛獲委任做社會投資共享基金委員會成員嘅深水埗區議員鄭泳舜(Vincent)本身已經係兩子之父,尋日又傳嚟好消息,Vincent又再弄璋之喜,屋企從今又多一個活潑可愛嘅囝囝,真係恭喜晒!連續生咗三個囝囝,當然即時問佢會唔會打算追個女啦,Vincent聽到即時耍手擰頭,話三個夠晒數喇喎。

Vincent明年好大機會出選立法會。佢細仔出世冇幾耐,暫時仲未諗到改個乜嘢中文名好,不過就已經替BB改咗個英文名Moses(摩西)。

Vincent解釋,佢哋全家人都係基督徒,思前想後決定幫細仔改個聖經人物名;至於中文名,就要遲啲同爺爺商量先可以決定。

拒盲目追求名牌奶粉

Vincent大仔同二仔都係食日本奶粉,再生多個,佢都無懼要到處撲奶粉,佢話因為太太決定餵人奶,而且一餵就九個月,所以暫時唔係問題,加上佢哋一向唔會盲目追求名牌奶粉,所以相信對佢哋一家嘅影響唔會太大。

Money18新功能「18好路數」為你預測心水股票升跌機會率