政情：橄欖畀黨友當宣傳工具
有網民最近喺facebook貼出一張民建聯觀塘區議員施能熊成功為街坊爭取汽水機嘅橫額，橫額上面除咗有當事人個名之外，仲印咗民記九龍東立法會議員陳鑑林（橄欖）個寶號。唔少網民都有留言揶揄，話呢啲小事根本唔應該大肆宣傳，亦有網民話呢啲宣傳招數已經將區議會選舉工程發揮到登峰造極添。
施能熊尋日話，民生無小事，加上真係有需求，做區議員一定要努力爭取。至於橄欖就話，爭取汽水機唔係自己功勞，佢亦唔介意人哋點講，因為外界根本唔會知地區街坊有乜需要；即使喺別人眼中微不足道嘅設施，可能都係區議員花咗好多心機先爭取到，所以唔覺得呢條橫額有乜問題。
今年係區議會選舉年，各個有意參選嘅人都肯定出盡奇招增加曝光率，橄欖話呢類網上留言即使陸續有嚟都唔出奇，佢自己就相信網民好多都好有智慧，會識得好好利用互聯網，唔會逞一時之快，將互聯網簡化成只得娛樂一種用途喎！