政情：袋巾傑反口選超級議席？
公民黨執委會早前達成共識，反對直選議員轉戰功能組別區議會超級議席，其實呢招係佢哋嘅內鬥招數，目的只係為咗阻截黨內新界東立法會議員湯家驊參選超級區議會。不過，公民黨高層綁人可能變綁死自己，尋日有消息傳出，新任黨魁梁家傑部署緊競逐超級議席，年底仲會喺區議會選舉出戰黃大仙橫頭磡選區；如果屬實，梁家傑就係自打嘴巴！
我哋尋日問梁家傑，佢否認部署參選區議會，不過話唔排除幾位新執委中，有人提出要推翻唔畀轉戰功能組別嘅議決，佢重申個人唔會同意，估計係有人放流料，想試探佢嘅參選去向咁話。所謂「空穴來風，未必無因」，消息又嚟自公民黨內部，係咪流料，到公民黨報名區選至知。事實上，梁家傑嘅助理正部署緊出戰橫頭磡，到報名前一刻換人，都好易啫。
橫頭磡現任區議員民建聯黎榮浩話，未聽聞梁家傑想挑戰佢；如果係就好嘞，佢喺○三年咁艱難都贏到，若然今年區選搵到梁家傑祭旗，明年要求出戰立法會，黨內預選實過關喎。