政情：呂鈞堯遇車禍封路無遲到
保良局尋日喺清水灣鄉村俱樂部舉行慈善高爾夫球賽，主席呂鈞堯（Quincy）差啲趕唔切主持大局。事關尋日早上約十點半，清水灣道近將軍澳坑口迴旋處發生車禍，有架泥頭車橫臥喺清水灣道，搞到封晒路，當時好多前往參加保良局活動嘅嘉賓都受阻，Quincy都唔例外。
雖然活動被迫延遲約一小時至開始，好彩天公作美，一眾嘉賓打高球嘅興致無受影響，順利為保良局籌得逾一百萬元。
講起呢場有驚無險嘅車禍，Quincy話當時佢正揸車經過出事現場，仲見到架車着緊火。原本佢想兜過去，但朋友勸佢稍安勿躁，因為肇事車輛仲有啲熱力，都係靜候條路解封好啲。好彩條路好快開番，佢都冇遲到。不過由於其他出席者包括記者專車受到封路影響，最後活動被迫由十二時延遲至近一時開始。
中策集團主席馬時亨都有嚟打波做善事，事關每隊要捐兩萬元至有得打，尋日共有十七隊參加競賽，每隊四人，加埋其他善長捐款，一百萬蚊輕易落袋，保良局又可以做多啲嘢喇！