相信好多影迷仲記得，三十年前荷里活有部賣座電影《時光倒流七十年》，講一個後生仔借助催眠術返到七十年前，同當時一位靚女演員熱戀，情節好鬼死感人㗎。
點解無端端提起英語殘片？咁就要由本港一個所謂「2010年最喜愛香港導遊」頒獎典禮講起嘞。呢個頒獎禮係由香港專業導遊總工會舉辦，出席嘉賓眾多，冠蓋雲集，當然唔少得旅遊事務專員容偉雄啦。佢致辭時狂吹水，話世界各地遊客只要親身來港體驗，就會「不期然愛上了香港」，仲扮晒心理學家，話遊客對一個地方嘅睇法，喺抵埠十幾分鐘內已大致形成。
高官賣花讚花香一啲唔出奇，之但係，抽水都要先睇吓環境啦。望真啲主辦單位派發嘅《香港國際2010旅遊展特刊》，咦，乜封面幅相咁有時光倒流Feel嘅？由銅鑼灣避風塘望過去中環，居然見唔到落成多年嘅香港第一摩天樓國金中心。咁都未夠Out，相入面仲戙咗大大個煙草廣告牌，明顯違例啦。
喂，九九年起，香港已禁止展示任何形式嘅煙草廣告啦，今年嘅旅遊展特刊居然搵十幾年前張相做封面，玩懷舊咩？主辦單位解釋話，用舊相係想展示香港變遷喎。最怕遊客睇到嘅唔係乜嘢變遷，而係以為香港呢十幾年停滯不前，連煙草廣告都仲可以大賣特賣，簡直係推廣變趕客，叫人點「愛上香港」呀？高官淨係識得做騷抽水，對呢啲問題毫無感覺，唔通畀人催咗眠？
做官不知時日過，難怪香港空蹉跎。講來講去，最唔與時並進嘅就係呢班高官，如果唔係當局闊佬懶理，冇監冇管，本港四大經濟支柱之一嘅旅遊業，點會搞到搖搖欲墜幾乎冧檔吖？
冇錯，導遊待客有道，服務周到，的確應該頒個獎項以資鼓勵。但不可不知，樹大有枯枝，族大有乞兒，香港固然有敬業樂業嘅好導遊，亦有專門劏客嘅黑心導遊，有獎亦都要有罰先至得㗎。當局長期放任唔理，坐視黑店及導遊聯手劏客，搞到醜聞無日無之，香港臭名遠揚，遊客望而卻步，呢啲咪就係當局報喜不報憂，推卸監管責任，縱容業內歪風種落嘅惡果咯。
講到監管失職，功夫茶真係火都嚟埋。嗱，最近爆出懷疑假導遊逼人購物，激死遊客嘅醜聞之後，當局扮晒魚蝦蟹，好似追到天腳底都要徹查到底咁。事實又點呢？客死異鄉嘅遊客已經化成灰，仲送埋返家鄉添，但當局連涉案嘅假導遊去咗邊都唔知，涉事旅行社到依家仲未正式出嚟交代事件，唔使問阿貴，呢件事拖吓拖吓，最後極可能又係大事化小，小事化冇，不了了之。
計功夫茶話齋，除咗褒揚做得出色嘅導遊，懲罰黑心導遊同樣重要，主辦單位不如明年搞搞新意思，加多個「最黑心導遊大獎」或者「劏人最狼大賞」，甚至特設一個「劏客幫兇獎」畀監管失職嘅官員，咁咪叫賞罰分明囉！