係人都知，曾蔭權呢個「氣候逃犯」改善空氣質素得把口，畀環保人士「通緝」，追到甩褲。查實，藍天白雲愈叫愈走，香港烏煙瘴氣，煲呔曾被「通緝」都未算狼狽，最受影響嘅係一班「空氣難民」，簡直係有氣冇碇抖。
顧名思義，「空氣難民」就係畀污濁空氣逼到走投無路嘅市民。呢，全港有一成二長者患有慢性阻塞性肺病（慢阻肺病），長期咳嗽同氣喘，甚至扯晒蝦，要靠儀器協助呼吸。大家咪睇小呢種病吖，世衞組織話，到二○二○年，呢種病會成為全球疾病第三大殺手，問你驚未。
慢阻肺病病人對空氣質素特別敏感，室內空氣對病情影響好大，濕度高、灰塵多嘅環境會令病發風險激增，空氣愈差，發病機會愈高。長者成日留喺室內，係最容易中招嘅高危一族，問題絕對不容忽視。
改善室內空氣本身冇乜難度，保持環境乾淨，多開冷氣，勤換隔塵網就搞掂。之不過，香港家陣樣樣都貴，對好多經濟條件麻麻嘅病人來講，一日三餐都要慳住使，多開冷氣，簡直係一種奢侈。正如有病人話齋，每個月電費成千蚊，點頂吖！
病人組織批評港府對經濟困難、冇能力改善室內空氣質素嘅病人支援不足，佢哋因為無經濟能力裝冷氣或者空氣清新機而頻頻發病。話時話，一日到黑焗喺室內已經夠慘啦，熱到實在難頂想打開窗，點知出面空氣更加惡劣，連氣都抖唔到，你話係咪變咗「空氣難民」呀？
喺香港，無論坐喺屋企定行出街，想抖啖新鮮空氣都難，空氣污染已經成為危害市民健康、阻礙經濟發展嘅「不治之症」。呼吸系統有病嘅人固然係慘，就算冇病冇痛好人一個，一樣頂唔順。
呢嗱，港大公共衞生學院有位洋教授賀達理，喺香港教咗二十三年書，專門研究空氣污染對健康嘅影響，今年四月三十日約滿，第二日即急不及待飛返英國祖家。佢坦言，唔係對香港冇感情，而係香港嘅空氣質素實在太惡劣，令佢頂唔順。唉，洋教授就可以一走了之啫，難為香港人走投無路，每日都要被迫吸埋啲烏煙瘴氣，想唔病都幾難。正如賀達理話齋，歸根究柢係港府無心改善，解決污染問題遠遠落後於新加坡。
講到同新加坡比，香港真係羞家咯。早排有間國際顧問公司公布最佳生活質素城市排行榜，新加坡蟬聯亞洲第一，喺全球二百二十一個城市入面排第二十八。香港連前五十名都唔入圍，排名第七十一，簡直輸足幾條街。
呢個排行榜專門為跨國公司向海外派駐僱員提供參考，香港出街要掩鼻，入屋抖唔到氣，嚟香港工作如同搵命博，外籍僱員梗係好似賀達理咁，個個走得快好世界啦。
煲呔曾搞環保一向口水多成績少，佢吹水話要同珠三角共建乜嘢「優質生活圈」喎，家陣畀人踢出優質生活圈就真。唉，「氣候逃犯」呢次睇怕又要「起錨」走佬咯。