追和湖人2:2 綠軍多得Big Baby
「大寶貝」成塞爾特人救星！昨日上演嘅NBA總決賽第四回合，塞爾特人主場以96比89擊敗湖人，總比數追成2比2。「綠軍」贏波功臣係後備格連戴維斯，呢位綽號「Big Baby」嘅肥仔嘜，喺關鍵時刻射入多球及搶得多個進攻籃板，帶領塞爾特人反勝，贏得關鍵嘅第四回合。
今場賽事分數咬得好緊，湖人喺頭三節完結後，仍以兩分領先，但第四節塞爾特人發威，格連戴維斯喺第四節取得9分，係佢全場嘅一半，加上搶得4個進攻籃板，令湖人一時間難以招架。
尼特羅賓遜「第二英雄」
塞爾特人另一替補球員尼特羅賓遜亦有出色表現，呢位身材矮細嘅控衞，多次突破湖人防線上籃成功，全場取得12分。湖人主將高比拜仁雖然保持水準，取得全場最高嘅33分及射入6個三分波，但湖人整體發揮不及塞爾特人，落敗無話可說。
體重接近三百磅嘅「Big Baby」表示：「今場波我乜都冇諗，淨係諗住要贏波，即使高比拜仁射出一個又一個難度極高嘅入球，但我完全冇理，只係集中精神諗點可以贏波，我喺場上搏晒命，相信呢種氣氛感染到其他隊友。」
湖人中鋒加素對輸波感到無奈：「下場第五回合非常關鍵，因為贏波嗰隊就叫胡，有好大心理優勢，我希望可以領先返回洛杉磯。」第五回合將於香港時間周一早上繼續喺波士頓舉行。
■本報綜合報道