林莉李公樂洋葱結緣
鏡頭前說話不多的模特兒林莉，在娛樂圈或模界都可算是一個異數，低調而不擅於表現自己。不過，面對說故事能手——李公樂導演，林莉難得侃侃而談自我剖白。二人結緣於俄羅斯，在短短的八天拍攝中，是自我尋求、互相啟發之旅，當洋葱一層一層剖開來，你會發現驚訝。
閱讀何嘗不是一份緣分及啟發，你得到了甚麼？
林莉為今年推出的慈善攝影集，之前專程前往俄羅斯取景，細心的朋友會發現，在精裝版的寫真集中隨書附送一張DVD光碟，裏面並非拍攝花絮，而是由李公樂導演、林莉主演的電影。
林：林莉 李：李公樂
林：今次係我第一次拍電影，同平時影相好唔同。雖然我之前有學戲，但只係幾個月嘅短期課程，因為冇實戰經驗，難免會生疏咗。
李：我覺得林莉係一塊未完全琢磨嘅寶石，擁有一個藝人需要嘅氣質、外表以及可塑性，但需要資歷以及人生經驗。可以話係乜都有，同時亦係乜都缺乏，欠缺過程。
林：我認為自己唔夠信心，好似當年我報名選港姐嘅時候，我一直冇畀父母知，諗住入咗圍先算，其實都係反映我對自己信心不足。我有懷疑過自己並唔適合呢行，亦有迷失嘅時候。我好需要人去照顧我，我從來都唔係一個強者，好依賴人，唔夠touch。
一層一層去摸索
李：你用好多形容詞形容自己，但其實你只係肯定呢堆形容詞。例如你話自己怕醜，但怕醜背後係乜？我認為人就好似洋葱，一層一層，你依家所了解嘅自己，可能只係其中一層，要不斷向裏面摸索。我都係一直找尋中。
林：我記得你話過我，我唔了解真正嘅自己。但我一直都覺得好了解自己。我係一個冷靜與熱情之間嘅人，多愁善感，容易開心亦容易感動，但我唔會表現出嚟，可能因為家庭背景關係，全家人都比較內斂，好低調亦唔擅於表達。參選港姐令我成長得好快，令我開始去表現自己，去觸動別人。入咗行之後，我覺得自己本質冇改變，但係不斷進步。
李：咁有冇「揞」住自己多咗？
林：都有，我想做番自己，唔想太假，但又要圓滑，呢個要有平衡。
李：我覺得藝人就好似魔術師喺台上表演魔術，唔會有人話佢個人假囉！
導演藝人相扶持
林：哈，我覺得你係一個好聰明嘅人，唔係表面上嘅聰明，亦唔係識做人嗰種，而係有大智慧，係大智若愚嘅類型。每當我迷失時，我就會諗起你，你會畀到新思維我。記得我唔開心嘅時候，你會同我講古仔。你好有深度，對電影好有熱情同堅持……（下刪一百字）
李：大家相識係一種緣分，有機會面對面傾偈都係緣分。呢個世界咁多人，好多人喺你身邊擦身而過，可能有個人喺你身邊出現好多次，但你一啲都唔察覺。導演同藝人嘅關係係一種緣分，你話我幫你好多，但我都有從中自我尋求。就好似夜晚行山路，內心忐忑，但身邊有個伴，大家有傾有講，表面上係我幫你，但同時你係扶持我。如果一個導演去到俄羅斯，但係冇咗女主角，咁我拍乜呢？
肥皂泡內的彩虹
林：其實我同你相識唔係好耐，係由去俄羅斯拍攝開始，拍攝只有八日時間。但係你打開咗我心入面嘅門。
我記得拍攝中段，由莫斯科搭飛機去聖彼得堡，轉機時我問你有關拍攝嘅嘢，你突然間爆咗句：「你唔了解真正嘅自己」，之後又講咗好多好玄嘅說話，我覺得呢個人有啲嘢喎！
之後拍攝遇到阻滯，我情緒好低落，你又同我講古仔，講咩國王同女王，我覺得你真係可以做編劇囉！但我聽完個心真係舒服咗，感覺好奇妙，令我重拾力量。每次迷失你都會令我叮一聲。
咁你又點睇我呢？
李：你對於我嚟講就係，一個剛落完雨嘅午後，陽光普照，周圍好曬而且翳悶，突然有一個肥皂泡飄過，透過陽光折射會見到肥皂泡入面嘅彩虹，心中一陣喜悅嘅同時，又擔心佢幻滅。你就係呢個肥皂泡喇！
林：咁總之我係畀到你喜悅啦！其他嘅嘢我就慢慢去咀嚼。
偷拍特務
在整個拍攝過程中，林莉坦言最難忘在俄羅斯的地鐵站拍攝那一場，她解釋：「因為當時我哋係偷拍，唔可以畀地鐵嘅保安發現，要好鬼祟進行，我哋初時扮作普通乘客，一有機會就拍攝，要喺好短時間投入狀態。」林莉笑言由於身高以及戲服獨特的關係，簡直是鶴立雞群，要混在乘客當中並不容易，很有特務正在進行特別任務的感覺。
DVD講乜？
電影原本的構思是關於林莉與俄羅斯男模在俄羅斯發生的一段浪漫戀曲，但最後變成了一個以環保為題材的故事，林莉略帶歉意說：「因為之前拍得太多片，最後個男主角嘅鏡頭剪剩好少，真係有少少對佢唔住。我同佢冇乜對手戲，當然亦冇親熱鏡頭。電影入面有好多藍天、森林以及海邊嘅鏡頭，帶出愛護大自然以及環保訊息。」
李公樂作品
曾導演的電影，包括《福伯》、《十分鐘情》之一《開飯》、《師奶唔易做》、《翻叮我老婆》、《潮性辦公室》等。
採訪：陳嘉敏
場地：穴藏