絲絲講場：美團吸客細額外賣單照殺
近排疫情咁嚴重，絲絲都多咗叫外賣，希望足不出戶，就可以享用到餐廳美食！不過，若果無遇正免運費等優惠，每次經外賣App送餐，都要畀大約30蚊運費。諗諗吓一個餐先係60蚊，但畀埋運費後，成筆開支大增，精明嘅絲絲覺得好蝕底！
推拼單兼免運費
一向做開外賣生意嘅美團點評（03690），可能諗到我哋呢啲慳妹嘅心態，近日推出咗個「拼好飯」新構思，主打低價拼單、免運費等服務。所謂拼單，就係當絲絲落咗單後，可以叫埋住喺其他地方（幾遠就唔知啦）嘅朋友仔一齊落單，咁單價谷大咗，就可以免運費。到時每人叫三十蚊嘅雲吞麵，都應該可以免費送餐啦！不過咁，「拼好飯」都有限制，就係只能夠喺同一個商戶落單，即係發起人想叫麵檔，朋友唔可以叫壽司，除非間麵檔賣埋壽司啦！
其實咁細筆嘅訂單都要接，事關內地外賣App競爭大，所以美團要出盡法寶，依家呢個服務已經喺部分內地地區進行測試。換言之，拼單服務喺香港暫未推出，絲絲寧願去抬啲外賣回家，慳得一蚊得一蚊啦！
余絲韻