絲絲講場：維珍布蘭森降格百萬富翁
由冇錢到成為百萬富翁，可能需要實力同毅力，但只要有足夠時間應該都唔難嘅；但係如果由億萬富翁降格成為百萬富翁，過程可能更容易，投資航空公司就得啦！大家唔好以為呢個只係笑話，而係真人真事。
航企重創 20億私己救亡
話說今年新冠肺炎疫情對全球航空業帶來重大衝擊，維珍航空（Virgin Atlantic）創辦人布蘭森要出動2億英鎊（約19.5億港元）嘅「私己錢」，先可以挽救呢間由佢一手創立嘅航空公司。
冇咗接近20億元私己錢好肉赤？但大家有冇諗過，呢個情況好可能係布蘭森本人早就預咗。因為佢曾經講過：「如果你想成為百萬富翁，首先要有億萬身家，然後再創立一家新航空公司。」唔好理佢呢番說話係唔係講笑，但都或多或少凸顯咗航空業係一個有幾咁燒錢嘅行業。
其實，布蘭森以外，全球各地仲有唔少富商巨子逃唔過航空業嘅「魔力」，即使之前間航空公司同啲飛機幫過佢哋賺得盆滿缽滿，但一場新冠肺炎，足以令佢哋「蝕入肉」。
巴菲特盡沽四大航空股
絲絲睇番彭博億萬富豪指數，十家由富商巨賈持有嘅大型上市航空公司，年初迄今市值已經蒸發咗140億美元（約1,092億港元）。而今年較早時，股神巴菲特承認已經清倉美國四大航空公司股票，仲令旗下巴郡錄得巨額虧損添。
另外，拉丁美洲最大航空公司南美航空（LATAM）已經喺紐約申請破產保護，其股東包括智利嘅奎多家族。創辦捷藍航空同埋加拿大西捷航空嘅尼勒曼，就已經沽出超過八成嘅藍色巴西航空（Azul）持股，原因係佢有3,000萬美元（約2.34億港元）嘅貸款被追繳保證金。所以話，就算你好有錢，都唔好貿貿然涉足航空業呀，除非你唔怕「降格」為百萬富翁！
余絲韻