絲絲講場：聯儲前主席憎通脹有段古
上月去世、享年92歲嘅美國聯儲局前主席沃爾克（Paul Volcker），於國際金融界有「巨人」之稱，除因佢身高超過兩米外，亦因為佢被公認為史上最偉大嘅聯儲局主席，佢任內最出名係打擊通脹。佢咁憎通脹，竟然關佢媽媽事！
零用錢追唔上物價升幅
沃爾克一九二七年生於美國新澤西州，阿爸係當地一個小城嘅行政長官，阿媽係嗰個時代少有受過大學教育嘅女性。
佢咁憎通脹，一切始於一九四五年，當時佢18歲剛喺普林斯頓大學畢業。媽媽決定每個月畀25美元資助佢，但係佢話「唔夠，我係男仔，要多啲！」
媽媽話：「你啲家姐都係攞咁多，你一樣。」佢反駁：「家姐嗰時係經濟大蕭條當中，依家我哋有通脹，我需要多啲錢！」但媽媽答得斬釘截鐵，就三個字：「我唔理！」即使家姐之後「聯署」幫佢「上訴」，阿媽始終「維持完判」：25美元！
就係咁，阿媽鍛煉出沃爾克嘅堅強性格，兼同通脹對着幹。
80年代大手加息至22厘
佢一九五二年於紐約聯儲銀行，由經濟學家做起，之後先後被6位美國總統委以重任。佢喺前總統卡特（Jimmy Carter）及列根（Ronald Reagan）期間出任聯儲局主席，最出名係八○年代初將利率大幅調高至近22厘，成功克服雙位數嘅超級通脹，至今依然係個奇迹。雖然即時令美國製造業、農業同房地產業陷入困境，但就為往後嘅經濟「黃金廿年」打下鞏固根基。
余絲韻