Market Insight：內房股成為避風港

近期環球股市，真係比「侵侵」玩到謝。短短兩星期，先係提出向美國進口鋼鐵及鋁材徵稅，以為貿易戰開打，簽署文件時又玩溫和，付上大堆豁免條款，放過加拿大、墨西哥等盟國。

正當以為雷聲大雨點小，大步檻過股市反彈之際，跟手白宮首席經濟顧問科恩忍唔住劈炮，之後「侵侵」夠膽死好似「真人Show」一樣，同國務卿蒂勒森講「You're fired」！

大市有波幅無升幅

話就話雖然古勝相信政治因素對股市影響短暫，不過今時今日，白宮變成肥皂劇咁，日日新鮮鑊鑊甘，因為一個神經刀總統，隨時一夜變天，鍾意炒出炒入走短線的，「侵侵」成為最難估的不明朗因素。會否如華爾街所料白宮換人後，會同在中美貿易不平衡問題上發炮？實在無得估，惟有控制吓注碼，一於食少多覺瞓。

昨日港股係威係勢，由最多跌過314點，拗腰倒升過148點，最終升106點收市。不過，睇番周一裂口開高於31,536點，以昨日收市計，只係高過起步位幾點咁大把。藍籌最夠鑊氣兩隻股份，中國平安保險（02318）及股王騰訊（00700）分別進帳3.4%及1%，托住個指數，大市正宗係有波幅無升幅。

炒股唔炒市，昨日輪到內房股發威，旭輝控股（00884）派成績表，去年多賺七成二，即刻見大行大合唱，最牛的交銀國際目標價睇10.72元，昨日股價一度炒高9.1%見7.42元的歷史新高，收報7.2元升5.8%。其他威威的內房仲有寶龍地產（01238）升8.8%，中國恒大（03333）升6.7%，融創中國（01918）升5.2%，碧桂園（02007）則升3.9%。

值得留意的是，除融創外，全部已經較大市更快返回二月六日港股大屠殺跌逾千六點前的水平，在貿易戰的戰雲密布下，內房被大孖沙當成避風港。

閱文再度蓄勢待發

古勝昨日推介的金蝶國際（00268），衝上7.07元見52周高後，倒跌9格收場。不過，同股不同權趕住登場，深圳又想以CDR搶飲獨角獸公司的頭啖湯，上半年資訊科技企業勢成焦點，估值必然水漲船高，相信炒風應該無咁短癮，短期整固後相信可以再發力。

另外，在下留意到騰訊親生仔閱文集團（00772）尾市走高，企住10天線並收復50天線，似乎80元樓下的收集期已經完成，短炒博佢攻破83元及86.3元短期阻力位，先睇90元。

古勝